Isto significa le fin de un regno decennal del coalition liberal-conservative. Anders Fogh Rasmussen esseva prime ministro de 2001 a 2009, e esseva succedite per Lars Løkke Rasmussen, ambes de Venstre, le partito liberal.
Paradoxemente, Venstre habeva un election excellente e es ora le major partito danese, durante que Socialdemokraterne habeva le pejor election in plus que 100 annos. Mais le coalition que les supporta ha un stricte majoritate in le parlamento.
Le partitos supportante es SF (Socialistisk Folkeparti, le partito socialista moderate), Enhedslisten (le partito socialista non tanto moderate), e Det Radikale Venstre (le partito social-liberal, cuje nomine significa "le sinistre radical", ben que es un partito dextere moderate).
Pro le prime vice SF va entrar in le governamento, e lor presidente Villy Søvndal es expectate a esser ministro de affaires extere. (Rememora me de narrar le historia de quando ille pensava que Fort Bragg esseva localisate 10 kilometros sub le calotte de glacie de Groenlandia.)
Le nove prime ministro pote expectar un labor difficile con mantener le coalition de partitos multo diverse que la supporta. In le campo de economia, le punctos de vista del partito social-liberal es diametricamente opposite a illos del duo partitos socialista.
Iste tres partitos es solmente de accordo super un cosa: le politica de immigration, le qual illes pensa debe esser minus stricte. Mais iste opinion non es dividite per le social-democrates.
Il es interessante, que Det Radikale Venstre supporta le social-democrates, e non le liberales con qui illes pare esser multo plus de accordo. Similarmente, le "infame" Dansk Folkeparti es multo plus proxime al social-democrates in tote questiones, excepte illo de immigration. Mais illes totevia supporta le coalition liberal-conservative.
Il parerea plus logic si iste duo partitos cambiava placias ...
