Le incontro de Chepelare

[Laurentio]

Heri io retornava del incontro de interlingua in Chepelare, Bulgaria.

In iste foro io va scriber un poco super mi experientias, e plus tarde publicar alcun photos e videos.

Durante multe tempore io esseva occupate con preparar un presentation, o con altere cosas practic, o simplemente con acclimatisar me, alora io non poteva participar in multe eventos planate. Pro isto il es difficile pro me commentar le programma conferential.

Ma in honestia, io non veni al conferentias pro le programma, ma pro le personas e le lingua. Io ha nunquam considerate interlingua como un causa, e me abstine de principio de tote essayas de promover lo.

Assi io era sceptic durante un session de nostre presidente de como 'vender' interlingua a personas de autoritate per certe technicas de communication usualmente empleate in le marketing de comercio. Il me pare que hic nos nos approcha a un limite ethic, que il serea sage non transversar.

Durante le conferentia esseva anque tenite le prime examines de interlingua. Io non participava in illos, proque esseva questionabile pro me é le autoritate del arrangiator de evalutar lo que es interlingua correcte, é le sagessa de divider interlinguistas in rangos secundo lor habilitates lingual.

Ben, a cata uno su gusto. Certe es, que me place multo le interlinguistas, e io considera multes mi bon amicos.

Finalmente, alcun pensatas al hasardo:

• il es plus calide in Copenhagen que in Chepelare!! (E naturalmente plus humide!)
• Multo poc bulgaros parla anglese (o altere linguas ultra bulgaro). Ante viages futur, io va preparar me melio e studiar un poco le lingua local.
• Chepelare es un agradabile parve urbe con inhabitantes pacific
• Il ha multe animales domestic in Chepelare - super toto canes e cattos que vaga in le stratas. Le corte del hotel esseva sovente visitate per cattos, gallinas, e anque vaccas.
• Io va nunquam, unquam facer un viage plus, sin haber un plus grande sacco de mano!
• Iil me pareva durante le sojorno que mi habilitate de parlar interlingua se habeva pejorate desde le ultime conferentia! Io deberea parlar plus con le interlinguistas per internet in le futuro.

[Laurentio]

Io pensa que le viage ha essite troppo pro mi membrana mucose. Io ha mal de gorga con tussir, e nares bloccate ...

[admin]

Seriosemente mal de gorga ora - non pote parlar. E deman io debe conducer mi auto a test e inspection!

[Peter]

Participantes in Bulgaria: como vade le dieta...?

Totos era de accordo, que post le conferentia ille/illa comencia un dieta...

[Laurentio]

Participantes in Bulgaria: como vade le dieta...?

Totos era de accordo, que post le conferentia ille/illa comencia un dieta...

Io non pensa que il esseva troppo mal. Es ver que habeva tres plattos pro le cena e lunch, ma le primes esseva un salata (ben que enorme), e le ultime del lunch solmente fructos.

Le puncto periculose esseva le jentaculo. Io debe confessar que le section con 'jentaculo anglese' habeva un grande fortia de attraction a me!

In tote caso, io dubita que le majoritate del participantes ha necessitate de un dieta multo longe - al minus non a causa del sojorno.

[Peter]

Io non assere, que le repastos era mal; al contrario: illos era de multo bon gusto e illos era seligite con grande competentia. Ma alicun participantes diceva, que "ci nos mangia troppo" e alicunos mesmo decideva - si seriosemente, si humoristicamente; io non sape - comenciar un dieta post haber retornate a casa.

Del resto io dubita, si illes ha totalmente ration: forsan in Bulgaria nos non mangiava troppo, ma le portiones normal, como cata uno in casa. Le differentia es, que ibi nos non nos habeva movite assatis (excepte le excursiones), ma sedite multo e forsan pro isto nos sentiva, que nos mangia troppo...

[Laurentio]

Participantes in Bulgaria: como vade le dieta...? Totos era de accordo, que post le conferentia ille/illa comencia un dieta...

Io non pensa que il esseva troppo mal

Io non assere, que le repastos era mal; al contrario

Io sape - io scribeva 'il' - non 'illo(s)' - dunque le significato de mi message era: "Io non pensa que il habeva mangiar tanto copiose e tanto grasse que on va haber necessitate de un dieta post le sojorno." De accordo?

[Peter]

Io es de accordo, que le repastos al lunch e al cena non era tanto grasse (como le repastos hungare), que besoniarea un dieta seriose. Ma on sempre debe prestar attention de non mangiar repastos troppo grasse, ma de mangiar nutrimentos plen de vitaminas, etc. (In Bulgaria il non habeva problema con isto, proque - como tu scribeva - sovente le prime platto era un enorme salata...)

Le puncto periculose esseva le jentaculo. Io debe confessar que le section con 'jentaculo anglese' habeva un grande fortia de attraction a me!

Io anque remarcava isto, que le periodo inter le jentaculo e le lunch era assatis breve pro haber de novo fame ante le lunch. Ma io recognosceva solmente in le ultime dies (e alora il era ja troppo tarde a realisar lo ), que pro isto io haberea debite mangiar minus al jentaculo - viste que le proportiones del lunch e del cena era fixe; i. e.: grande...

[carlos soreto]

Salute!

Ecce alcun photos (sin ordine chronologic) de nostre viage/sojorno, ubi on pote vider alcun personas regalante se ...

https://picasaweb.google.com/csoreto/Bu ... directlink

Nos nos amusava multo (como sempre) e regratia le compania e amicitate de omnes qui participava, le septimana passate, al conferentia in Bulgaria.

carlos & edite

[admin]

Multe gratias pro vostre photos, Edite e Carlos! Illos me multo place (non solmente proque tu non succedeva a photographar mi codice bancari, Carlos!).