Mi excusas pro haber essite inactive durante le ultime menses!
Un fato cruel me ha fortiate a continuar mi studios universitari, e isto ha occupate multe tempore mie.
Desde ora, io promitte de (tentar de) scriber plus regularmente.
In general, le activitate hic non ha essite tanto alte como on poterea desirar. Ma io ancora pensa que Interforo offere un multo bon medio de communicar in interlingua. In le listas de e-posta il anque ha multo poc activitate, excepte in le un gruppo ubi quasi tote discussiones tracta themas etymologic.
Plure membros ha lamentate que on non pote reciper e scriber messages de Interforo per e-posta. Io es certe que un tal functionalitate poterea augmentar le activitate e facer multes adjunger se a nos, qui prefere listas de e-posta.
Le problema es que un tal functionalitate non existe pro phpBB. Illo existe al altere latere pro vBulletin, un programma de foros commercial. Le problemas con cambiar a iste programma sera: 1) io deberea pagar pro illo, e 2) mi traductiones del interfacie de phpBB serea perdite - pro haber un interfacie in interlingua on deberea traducer tote le interfacie de vBulletin ab ovo, e io non ha tempore pro isto in le menses veniente. Isto significarea que, al minus durante alicun menses, le interfacie serea in anglese.
Que pensa vos? Esque vos volerea que on poterea facer le foros de Interforo functionar como listas de e-posta, assi que on recipe le messages del foros que interessa uno per e-posta? E es isto plus importante que haber un interfacie in interlingua?
A rescriber!
