Proque usa io interlingua?

Proque usa io interlingua?

Message publicper McDutchie » ven. nov 27, 2009 5:45 pm

Car omnes,

In un pagina de discussion a Wikipedia, un persona qui recentemente discoperiva interlingua voleva leger rationes proque apprender interlingua, e opiniones de qual lingua (interlingua o anglese) es melior. Mi responsa deveniva longe como un articulo, e io pensa que alteres poterea voler leger lo.

----

Non me place le question de qual lingua es plus “bon”. Io prefere responder a un altere question: qual rationes o motivos existe pro usar interlingua, e quales existe pro usar anglese? Mi responsas es incomplete, proque tu me limitava a tres punctos... io poterea scriber un tote libro super isto. :-)

Motivos pro usar interlingua como lingua auxiliar international:

1. Interlingua es le unification in un lingua concrete del “vocabulario scientific international” commun a quasi tote le linguas de Europa e del mundo. Dunque, interlingua offere un function propedeutic pro cognoscer melio le vocabulario intellectual del proprie lingua materne. Secundo un methodo consistente e reproducibile, cata vocabulo de interlingua ha essite derivate de un certe numero de linguas natural existente, reducite a un prototypo comprensibile per medio de recercas etymologic, e regularisate in familias derivational. [http://www.interlingua.com/node/393] Cognoscer interlingua significa cognoscer non solmente le signification, ma tamben le composition del parolas international presente in le proprie lingua materne. [http://www.interlingua.com/historia/diverse/experientias.htm] [http://www.interlingua.nu/paginas/parolas.htm]

2. Interlingua es comprensibile a prime vista (e a prime audita!) a centos de milliones de locutures de linguas neolatin. Un portugese non comprende italiano e un romaniano non comprende espaniol, ma tote le “neolatinophonos” comprende instantaneemente le factor commun, concretisate in interlingua. Considerante que le cognoscentia del anglese non es ben diffundite in iste populationes, interlingua pote esser un excellente alternativa.
(Personalmente io provava iste concepto primo in novembre de 2008: io pronunciava un discurso a un conferentia super autismo in le citate de Porto, Portugal, totalmente in interlingua, sin preparar le audientia; io les surprendeva. Secundo le consenso general, interlingua se comprendeva plus facilemente que le anglese parlate per mi amica e co-orator. [http://autismo-norte.blogspot.com/2008/10/dentro-do-inside-vision.html] Le organisator nos re-invitava in junio 2009, e iste vice nos dava un serie de sex seminarios durante duo dies, toto in interlingua.)

3. Interlingua es multo facile de apprender e de usar activemente, multo plus facile que anglese o qualcunque altere lingua national. Le grammatica es regular e minimal. Le vocabulario es systematic, concrete e ben definite; il non es necessari preoccupar se de subtilitates idiomatic o cultural. A personas ben educate, le majoritate del vocabulario es ja familiar ex le linguage formal/intellectual del proprie lingua national; e vice versa, a personas sin education formal, apprender interlingua porta le beneficio additional de acquirer le cognoscentia del “parolas difficile” del proprie lingua. Novicios que assiste al curso pro comenciantes a un conferentia de interlingua generalmente parla interlingua passabilemente post un septimana de immersion. Interlingua es un investimento favorabile: on recipe le supra-mentionate beneficios pro effortio relativemente minimal.

Motivos pro usar anglese como lingua auxiliar international:

1. Communication inter locutores non native: Anglese es le lingua international dominante a causa del domination cultural anglo-american. Centos de milliones de personas de paises non anglophone ha apprendite le anglese.

2. Communication con locutores native: Anglese es obviemente superior pro communication con anglophonos native (si on lo parla e comprende ben; le pronunciation native del anglese es difficile de comprender!).

3. Superior ressourses pro apprension: Existe un enorme communitate de parlantes non native del anglese, amplissime ressources in omne pais del mundo pro facilitar le apprension e exercitio, inseniamento in scholas ubique, un magne litteratura, etc. etc.

Le argumentos pro anglese es ben cognoscite, e io non vole elaborar los. Nemo ha le illusion que interlingua pote supplantar anglese como lingua auxiliar international. Ma io es absolutemente convincite que le cognoscentia de interlingua es un superbe e profitabile complemento al cognoscentia de anglese. Interlingua es un medio pro major comprension del aspectos international del proprie lingua materne, pro diverter se in le micre communitate de interlinguistas, e pro communciation con non-parlantes de interlingua. Secundo mi cognoscentia, interlingua es le sol lingua in existentia que pote effectivemente compler iste functiones.

In fundo, io pensa simplemente que il es un grande placer exprimer me in nostre belle interlingua, que ha tote le elegantia del simplicitate, e tote le peso linguistico-cultural del historia commun de Europa.

- Martijn

[1] http://www.interlingua.com/node/393
[2] http://www.interlingua.com/historia/div ... entias.htm
[3] http://www.interlingua.nu/paginas/parolas.htm
[4] http://autismo-norte.blogspot.com/2008/ ... ision.html
McDutchie
 
Messages public: 69
Membro desde: sab. jul 04, 2009 10:59 pm

Re: Proque usa io interlingua?

Message publicper Novparl » jov. dec 24, 2009 12:53 pm

Excuse English - short of time. Actually, Interlingua isn't that easy if you already know some Latin languages, as the original Latin can become several forms. Cheers.
Novparl
 
Messages public: 10
Membro desde: mer. jul 22, 2009 10:28 am

Re: Proque usa io interlingua?

Message publicper McDutchie » dom. dec 27, 2009 12:41 am

Si, io ha previemente pensate que il es probabilemente plus facile de scriber e parlar in interlingua pro me, como nederlandese, que pro un espaniol, italiano o francese. Mi lingua materne non es neo-latin e non causa "interferentia" grammatical con interlingua. E le parolas international importate in nederlandese ha orthographias multo similar al correspondentes in interlingua; p.ex. le consonantes duple corresponde quasi exactemente (e es relevante al pronunciation).
McDutchie
 
Messages public: 69
Membro desde: sab. jul 04, 2009 10:59 pm


Retro a(l) Discussion general de interlingua

Qui es in linea

Usatores qui lege iste foro: Nulle usatores registrate e 1 visitante