DE ASIA DEL EST
- Le 19 de april 2010: Seismos sequente continua in le prefectura autonom de Yushu, provincia de Qinghai, China del nord-west. Le numero de victimas del seismo principal, que ha evente in mercuridi, ha attacte duo milles.
DE EUROPA DEL NORD-WEST
- Le 20 de april 2010: Post le crise financiari, in le septimana ultime Europa ha essite affectate per un crise de cinere. Le cinere del vulcano Eyjafjallajökull, Islanda del sud, ha paralysate le movimentos de aviones e illo ha causate problemas gigante pro le aviation e le economia europee. Le Association International de Transporto Aeree ha anunciate, que a causa del crise de cinere firmas de aviation perderea plus multe pecunia que illos ha perdite a causa del attacos terroristic in le 11 de septembre 2001. Le situation ha parturite alicun burlas:
1. Secundo le calendario maya, le vulcano calmara se si tosto que un medietate de Europa habera pronuntiate su nomine correctemente.
2. "Eyjafjallajökull" es un expression islandese pro "tu dormira in le aeroporto".
3. Eruptiones del vulcano Eyjafjallajökull occure solo duo vices in un anno - depost aprile usque a septembre e depost octobre usque a martio.
4. Le desiro ultime del economia de Islanda era dispersar su cinere trans Europa.
5. Le islandeses extinguera le vulcano si tosto que le mundo habera pardonate lor debitos.
DE ASIA DEL SUD-EST
- Le 20 de april 2010: Un nov argumento pro timentes de Facebook: Policia in Bogor, Indonesia del sud, ha recepte un reporto per Jesika Danies, studente de vetustate de 22 annos, qui assere, que alteres ha publicate photographias nude de la in Facebook. Illa dice sentir se humiliate.
DE ASIA DEL SUD-WEST E AFRICA
- Le 23 de april 2010: Le prime ministro de Israel Benjamin Netanyahu ha de nove rejectate demandas del Statos Unite de America, que ille suspende le construction de domos in le Jerusalem del est occupate. Le oppression de palestinos per Israel sembla esser le causa principal e clave del terrorismo islamic global. Le Nationes Unite assere, que le blocada de Gaza per Israel impedi un education de milles de impuberes palestin.
DE STATOS UNITE DE AMERICA
- Le 23 de april 2010: Per un rocchetta Atlas V le armea statunitense ha successe lancear un nov navetto spatial Boeing X-37. Le nov navetto es 8.8 metros longe e le invirgatura es 4.6 metros. Il sembla, que per iste projecto iste nov navetto reimplaciara le navetto actual, cuje volos fini in iste anno.
DE MUNDO NOVE
- Le 25 de april 2010: In Melbourne, Victoria, Australia del sud-est, durante un parada militar un camion vetere ha ultrapassate septe veteranos vetule inter septanta e octanta annos. Le cause probabile del disastro ha essite un problema technic. Durant un parada simile in Nove Zelanda un helicoptero vetere ha case, occidente tres pilotas.
DE EUROPA DEL SUD-EST
- Le 27 de april 2010: Le parlamentos e de Russia e de Ukraina ha ratificate un tractato de un prolongation del presentia del flotta militar de Russia in Sevastopol, Crimea, que es un republica autonome russe in Ukraina del sud. Le resistentia de adherentes del presidente precedente Viktor Yushchenko e del prime ministra precedente Yulia Tymoshenko era tanto forte, que illes jectava bombas de fumo e ovos directemente in le parlamento de Ukraina.
Remarcas:
- Forsan vos trovara, que le novas son colorate per un ideologia. (Per exemplo le phrase: "Le oppression de palestinos per Israel sembla esser le causa principal e clave del terrorismo islamic global.") Isto non significa, que io ipse serea de tal opinion, o que io volerea, que vos sia de tal opinion. Io solo crede, que de tempore in tempore il pote esser interessante saper le opiniones del altere parte.
- Correction de errores es benvente!
