Interforo.org

Salute amicos,

Pro le 20me conferentia international de interlingua (27 de julio - 3 de augusto 2013, Freiburg, Germania) nos va haber un thema: un phrase general e multo curte (inter un e cinque parolas) que debe inspirar le discursos, seminarios e altere sessiones offerite.

Haber un thema es costumari pro altere conferentias, ma il es le prime vice que le conferentia de interlingua habera un thema.

Pro adjutar nos a determinar le thema, nos vole invitar le participation del publico. Que es vostre ideas?

Alcun possibile themas que ha jam occurrite a nos:

• "Cooperation interlingual"
• "Interlingua in le futuro"
• "Interlingua como lingua economic"
• "Defender interlingua e linguas minoritari"
• ...e vostre idea?

Per favor responde a iste message con vostre ideas pro un thema.

Pro le commission del programma,
- Martijn (vice-secretario del UMI)

Salute!

"Cooperation interlingual" sona interessante.
Io sape que Erik ha initiate contactos con le communitate interslavic e presentate le idea que un del disveloppatores del slovianski/neoslavonic poterea
pronunciar un discurso al conferentia.
Forsan un cooperation inter plure linguas auxiliar zonal potera esser un bon idea pro le futuro. Existe anque le projecto inter-germanic "folkspraak".
In Asia existe le possibilitate de un "interlingua" que unifica differente linguas affin como hindi, urdu, persian, pashto, kurdo etc.
Le possibilitate existe pro differente linguas auxiliar que uni le differente familias de linguas inter se a promover se insimul como idiomas apte pro
communication con su vicinos lingual, si on vole omitter anglese.

"Interlingua in le futuro" anque es un thema importante. Un nove generation de interlinguistas debe continuar le labor del vetere generation.

"Le cultura de interlingua" es anque un thema possibile. Le puncto focal in iste caso serea le litteratura de interlingua e forsan anque altere formas
de cultura. Theatro? Films?

/Scrip

Gratias pro le responsa, Scriptor.

"Le cultura de interlingua" es un belle possibilitate; io lo ha addite al lista de ideas a considerar.

Salutes,
anque io crede que le thema "Cooperation interlingual" o un altere sublineante le parola "Cooperation" es interessante.
Isto proque, in fin, Interlingua mesme es un projecto "in cooperation".
Salutationes

Gratias pro le responsa, Gio.

Io vole adder un clarification: Quando io suggereva "cooperation interlingual" como exemplo de un possibile thema, io non prevideva que illo poterea referer al cooperation con altere linguas auxiliar international -- ben que, in retrospecto, iste interpretation es obvie.

Un discurso o session sur le cooperation de altere linguas auxiliar pote esser imaginabile, ma le objectivo statutari del UMI (e de su conferentias) es le uso e promotion del interlingua de IALA. Dunque, io non pensa que il es realistic dedicar un tote conferentia de interlingua a un tal thema.

Pro me, le parola "cooperation" voleva referer al promotion de un spirito cooperative intra le movimento de interlingua, como anque Gio suggereva. Forsan "cooperation pro interlingua" esserea plus clar.