Salutes a toto!

Per favor scribe alicun parolas super te mesme

Salutes a toto!

Message publicper Stanley Mulaik » sab. jun 13, 2009 10:21 pm

Io es un vetere interlinguaista. Io ha discoperite interlingua in 1954 quando un studente in le
universitate. Dr. Gode habeva un columna "Novas de Scientia" in "Science News Letter", a que
io esseva abonate. Io esseva attrahite a interlingua a causa de su naturalessa e le maniera
scientific in que illo ha essite disveloppate.

Mi carriera ha essite como un psychologo academic con specializationes in le psychologia
clinic (non active) e le psychologia quantitative. Pro quasi tote mi carriera io ha
essite un professor de psychologia al Instituto Georgia del Technologia (Georgia Tech)
in Atlanta, Georgia. In 2000 io esseva pensionate, mais ha continuate a inseniar
cursos fin a 2005, quando le Schola de Psychologia de Georgia Tech ha trovate mi
reimplaciamento. Alora io esseva completemente pensionate.

Mais io ha in le interrim continuate interesses in interlingua recomenciate in 1995
post un longe periodo de inactivitate a causa de pressiones professional e de
mi familia. Io ha initiate le production de un dictionario de espaniol-interlingua,
que esseva continuate con Horacio Martinez e finite in circa 2000. Io ha producite
un lista de circa 184 particulas romance, usante le methodos de IALA, con le
extension del cerca pro particulas a minor linguas romance in addition al tres
original linguas de francese, italiano, e espaniol/portugese. Multe de iste
particulas jam existe in le IED, mais sin litteras de credito de esser prototypos.
Io ha constate lor stato como prototypos. Le ration solmente particulas
romance esseva considerate esseva proque solmente le linguas romance ha
particulas commun con le initial tres linguas romance major in le original
gruppo de linguas fontes de interlingua. Solmente per adder le cerca de
linguas supplementari como catalano/occitano, romaniano, poteva nos
haber bastante linguas pro determinar un complete lista de particulas
compatibile con le methodologia. Gode originalmente ha facite un
studio pro E. Clark Stillman del gruppo angloromance in 1940, mais
ha fallite in obtener plus que 73 prototypos, essential de francese,
italiano, e espaniol/portugese (anglese contribue quasi nihil al lisa).
Iste studio habeva le seriose limitation que il habeva solmente tres
linguas que possibilemente pote producer un prototypo commun a tres
variantes--francese, italiano, e espaniol/portugese. Quando al minus
un tal lingua non ha un variante commun con le resto, necun solution
es obtenite. Assi Stillman e Gode ha decidite in loco a usar particulas
latin, multo similar al particulas de Interlingua sine flexione de
G. Peano. Mais al ultime momento Gode ha instruite Hugh Blair a
collectionar un lista de particulas in altere linguas constructe pro
includer los in le IED, pro facer le IED utile pro iste linguas a
meliorar lor vocabularios con formas international. Istos appare in
le IED in [ ]. Mais necun effortio esseva facite pro determinar si illos
satisface le methodos de standardization del resto del vocabulario.
Tal effortio io ha facite, e le resultato es un lista de 183 particulas
romance prototypic. Con illos tu pote scriber a personas qui
comprende linguas romance, e tu pote apprender leger textos
in le linguas romance, que face interlingua un optime ponte commun
a iste linguas.

Ultra iste effortios con interlingua, in le iterim depois mi
pensionamento, io ha scribite duo libros pro uso in cursos
universitari. Un es un revision de mi FOUNDATIONS OF
FACTOR ANALYSIS, e le altere es un nove libro, LINEAR
CAUSAL MODELING WITH STRUCTURAL EQUATIONS. Illos
es ora in preparation pro publication a Chapman e Hall/CRC,
un division de Taylor & Francis.

E io continua a rotar petras in barrilettos pro formar e
polir los. Io es un "rockhoud", uno qui cerca belle
petras, sovente agatas, pro rotar e abrader los pro
formar petras de joieles. Le placer es in cercar pro
illos in le desertos, fluvios e plagias del Statos Unite.

Stanley Mulaik
Stanley Mulaik
 
Messages public: 6
Membro desde: sab. jun 13, 2009 9:38 pm

Re: Salutes a toto!

Message publicper admin » lun. jun 15, 2009 2:07 am

Benvenite, Stan. Il me gaude vider te hic!

Como sta tu sposa?

Io non sapeva que tu era un "can de petras". (Io anque non sapeva que iste expression existeva.) :-)

Il me face curiose que tu scribe que tu los "rota in barillos". Como exactemente occurre isto?

(NB - io ha movite tu message a hic, ubi illo es plus facile a trovar (le altere foro non plus era active).)
http://www.interforo.org
Corrige mi messages in "Adjuta con interlingua". Scribe mi nomine de usator in le subjecto. Non corrige errores de typamento e simile bagatellas.
admin
Site Admin
 
Messages public: 67
Membro desde: sab. jan 31, 2009 6:12 pm

Re: Salutes a toto!

Message publicper Stanley Mulaik » mar. jun 16, 2009 4:17 am

Salutes!
Mi sposa es multo melior, ben que illa ancora recipe le therapia physic pro
fortificar se.

Stan
Stanley Mulaik
 
Messages public: 6
Membro desde: sab. jun 13, 2009 9:38 pm

Re: Salutes a toto!

Message publicper Stanley Mulaik » mar. jun 16, 2009 4:58 am

Le barillettos es facite de dur gumma. Lor exterior es circular. Le lateres del interior ha dece
superfacies platte, como si un decagono equilateral ha essite usate pro formar le interior. Le
base del interior es platte. Al cima es un platto de aluminium, coperite con gumma al latere
verso le interior. On insere le coperatura de aluminium super le aperatura pro clauder
lo, e super isto es un altere disco de aluminium que es fixate al platta o coperatura
con un vite e un matre vite. Le barilletto rota in un apparato que ha duo barras ronde
coperite con gumma pro facer friction con le barilletto. Iste barras rota, e illos
recipe le torsion de un motor. Quando le barras rota, le barilletto i super le barras e
es rotate per le rotation del barras.
Le petras es ponite in le barilletto, insimul con alcun aqua (non troppo) e alcun
abrasivo de carborundo. Le barilletto con petras rota pro circa tres septimanas.
Alora le petras es removite e es lavate pro remover tote abrasivo e fango producite
per le abrasion. Le barilletto es lavate equalmente pro remover tote tracias del
abrasivo. Le abrasivo ha diminuite se in le grandor de su parrticulas e es multo fin
al fin. Le petras ha un semipolite condition.
Alora le petras es reinserite in le barilletto, e un multo fin pulvere de oxydo de
aluminium (que es multo dur) es addite pro polir le petras a un lustro insimul con
aqua. Le barillettos de petras es ponite super le apparato (le rotatores) e i pro
circa septe plus dies. Alora le petras es removite, lavate, e illos es multo belle.

Io los da a tote le mundo que io incontra. Isto es alque que mi patre ha
comenciate, e io lo continua. De facto un de mi apparatos es le sue.
Ille ha morite circa 14 annos de retro e ha lassate su apparato a me.

Ora io ha usate alcun parolas in interlingua que io non jammais ha usate
previemente!

Stan
Stanley Mulaik
 
Messages public: 6
Membro desde: sab. jun 13, 2009 9:38 pm

Re: Salutes a toto!

Message publicper admin » ven. jun 19, 2009 12:10 am

Stanley Mulaik scribeva:Ora io ha usate alcun parolas in interlingua que io non jammais ha usate
previemente!


E io ha legite alicun parolas, que io non previemente habeva legite, ni in interlingua, ni in altere linguas. :)

Ma io ha comprendite lo que tu scribeva. Gratias pro le description.

Esque tu ha alicun photos del petras resultante?
http://www.interforo.org
Corrige mi messages in "Adjuta con interlingua". Scribe mi nomine de usator in le subjecto. Non corrige errores de typamento e simile bagatellas.
admin
Site Admin
 
Messages public: 67
Membro desde: sab. jan 31, 2009 6:12 pm


Retro a(l) Presentation del usatores

Qui es in linea

Usatores qui lege iste foro: Nulle usatores registrate e 2 visitantes

cron